მასალის გამოყენებისას
მიუთითეთ
საიტის მისამართი!



ალექსანდრე ჟღენტი
ალექსანდრე ჟღენტი
04.04.1945


საქართველოს კინემატოგრაფისტთა შემოქმედებითი კავშირის წევრი
ამ გვერდს გაეცნო 9588 სტუმარი
ბიოგრაფია

დაიბადა 1945 წლის 4 აპრილს. სწავლობდა თბილისის სახელმწიფო უნივერსიტეტის აღმოსავლეთმცოდნეობის ფაკულტეტზე – არაბული ქვეყნების ისტორიის სპეციალობით, 1965-1971 წლებში ი.კ. კარპენკო-კარის სახელობის კიევის კინოსა და თეატრის ინსტიტუტში კინოსარეჟისორო ფაკულტეტზე (ვ. დენისენკოს სახელოსნო). 1972 წლიდან მუშაობდა რეჟისორად კინოსტუდია "ქართულ ფილმში". 1978 წლიდან არის კინემატოგრაფისტთა კავშირის წევრი. 1978–1982 წლებში იყო ახალგაზრდა კინემატოგრაფისტთა სექციის თავმჯდომარე. 1990 წელს იყო ინიციატორი ფეხბურთში ეროვნული ჩემპიონატის ჩატარებისა. 1990-1991წლებში იყო საქართველოს ფეხბურთის ფედერაციის საექსპერტო კომიტეტის თავმჯდომარე. 1990 წელს საქართველოს უზენაესი საბჭოს დეპუტატი. 1991 წლიდან საქართველოს საპარლამენტო კინორეფორმის კომისიის თავმჯდომარე. არის ვასილ ამაშუკელისა და ალექსანდრე წუწუნავას საზოგადოების დამფუძნებელი (1991). 2002 წელს სპორტული კინოსა და ტელევიზიის მსოფლიო დღის დაარსების ინიციატორი. 2003 წლიდან არის საქართველოს სპორტული კინოსა და ტელევიზიის ფედერაციის პრეზიდენტი, 2008 წლიდან საპატიო პრეზიდენტი, 2005 წლიდან საქართველოს რესპუბლიკის უზენაესი საბჭოს თავმჯდომარის მოვალეობის შემსრულებელი. 2008 წელს, ქ. ბათუმში გამართულ მართლმადიდებლური ფილმების III საერთაშორისო ფესტივალზე მიენიჭა პრიზი ”წმინდა ანდრიას ჯვარი” - კომუნისტური რეჟიმის პერიოდში შემოქმედებითი გამბედაობისათვის. აფხაზეთის ხელოვნების დამსახურებული მოღვაწე (1977).


ფილმოგრაფია

დამდგმელი რეჟისორია ფილმების:
1. ქართული ფეხბურთი 110 წლისაა (2011) - დოკუმენტური
2. საქართველოს ზარები (1993) - დოკუმენტური
3. გაუმარჯოს პრეზიდენტს! (1991) - დოკუმენტური
4. პირველი ეროვნული (1990) - დოკუმენტური
5. გვჭირდება თუ არა საბჭოთა კავშირის ჩემპიონატი ფეხბურთში? (1989) - დოკუმენტური
6. გაუმარჯოს ქართულ ფეხბურთს! (1987) - დოკუმენტური
7. გურია! გურია! გურია! (1984) - დოკუმენტური
8. სტადიონი (1980) - დოკუმენტური
9. ამბავი აფხაზი ჭაბუკისა (1977)
10. ცოტნე დადიანი (1971)
11. მონადირე (1970)

სცენარის ავტორია ფილმების:
1. ქართული ფეხბურთი 110 წლისაა (2011) - დოკუმენტური
2. საქართველოს ზარები (1993) - დოკუმენტური
3. გაუმარჯოს პრეზიდენტს! (1991) - დოკუმენტური
4. პირველი ეროვნული (1990) - დოკუმენტური
5. გვჭირდება თუ არა საბჭოთა კავშირის ჩემპიონატი ფეხბურთში? (1989) - დოკუმენტური
6. გაუმარჯოს ქართულ ფეხბურთს! (1987) - დოკუმენტური
7. გურია! გურია! გურია! (1984) - დოკუმენტური
8. ბაქანი (1984) - დოკუმენტური
9. სტადიონი (1980) - დოკუმენტური
10. ამბავი აფხაზი ჭაბუკისა (1977)
11. მშვიდობით კაპიტანო! (1973) - დოკუმენტური
12. მონადირე (1970)
13. ფანჯარა (1965)


 
 
 
 
 
 
 
 
 




შეტყობინებები:

1. ზოგიერთი რამ ალექსანდრე ჟღენტის შესახებ:
   ალექსანდრე ჟღენტის მოღვაწეობის დასახასიათებლად ხშირად დაიწერება სიტყვა პირველი.
   ქართველთაგან მან პირველმა დაამთავრა კიევის კინოსა და თეატრის ინსტიტუტის კინოსარეჟისორო ფაკულტეტი. იგი არის საქართველოს პირველი რეჟისორი, რომელმაც პირველმა განახორციელა „ქართლის ცხოვრების“ ფურცლების ეკრანიზაცია სადიპლომო ფილმით „ცოტნე დადიანი" (1971 წ). ფილმის გადაღებიდან 28 წლის შემდეგ ქართულმა მართლმადიდებლურმა ეკლესიამ ცოტნე დადიანი წმინდანად შერაცხა, ხოლო სურათის გადაღებიდან 38 წლის შემდეგ, ბათუმის მართლმადიდებლური ფილმების საერთაშორისო ფესტივალზე რეჟისორმა მიიღო პრიზი „წმინდა ანდრიას ჯვარი“ - „კომუნისტuრი რეჟიმის დროს შემოქმედებითი გამბედაობისთვის“(2009 წ.).
   ალექსანდრე ჟღენტი არის საქართველოში პირველი რეჟისორი, რომელმაც პირველი სადებიუტო ფილმის შემდეგ კ/ს „ქართულ ფილმში“ (სრულმეტრაჟიანი „ამბავი აფხაზი ჭაბუკისა“) მიიღო ხელოვნების დამსახურებული (აფხაზეთი) მოღვაწის წოდება. ასეთი სტარტის შემდეგ მას ამ სტუდიაში ფილმი არ გადაუღია. მისი სცენარით სპორტულ თემაზე გადაღებულმა ფილმმა („მშვიდობით კაპიტანო!“) რეჟისორი ოთარ გურგენიძე - პირველად ქართული ფილმების ფესტივალზე მოიპოვა საუკეთესო დოკუმენტური ფილმის პრიზი (1978 წ.). საბჭოთა კავშირის დაშლამდე ყოველწლიურად 15 რესპუბლიკის დოკუმენტური სტუდიების ხელმძღვანელთა ჟიური ასახელებდა ქართული დოკუმენტური კინოს საუკეთესო ფილმს. მხოლოდ ერთხელ, პირველად და უკანასკნელად ეს ტიტული მოიპოვა სპორტულ თემაზე გადაღებულმა სურათმა - ეს იყო ალექსანდრე ჟღენტის თავისივე სცენარით გადაღებული „ გურია! გურია! გურია!“ (1984).
   1988 წელს იტალიაში, პალერმოს სპორტული კინოსა და ტელევიზიის საერთაშორისო ფედერაციის ასამბლეაზე, ალექსანდრე ჟღენტმა ოფიციალურად წამოაყენა წინადადება თბილისში უნიკალური კინოფესტივალის ჩატარების თაობაზე, სადაც წარმოდგენილი უნდა ყოფილიყო მხოლოდ ”საფეხბურთო თემატიკის” ფილმები. ასეთი რამ მანამდე არსად არ განხორციელებულა. ასამბლეამ ერთხმად მიიღო წინადადება, თუმცა იდეა ვერ განხორციელდა. სამაგიეროდ, შემდგომში ამ წინადადების ანალოგიით, მილანის საერთაშორისო ფესტივალზე დაარსდა ცალკე საფეხბურთო ნომინაცია, რომელიც დღემდე მოქმედებს.
   ალექსანდრე ჟღენტი აირჩიეს საქართველოს კინემატოგრაფისტთა კავშირის ახალგაზრდა კინემატოგრაფისტთა სექციის პირველ თავმჯდომარედ (1978-1982 წწ.). ალექსანდრე ჟღენტი არის ავტორი სამსერიიანი მხატვრული ფილმის სცენარისა „სახლი სიხარულისა“ , რომელშიც მოთხრობილია თბილისის 1500 წლოვანი ისტორია დასაბამიდან მე-20 საუკუნის 90-იან წლებამდე. ეს იყო მსოფლიოში პირველი პროექტი, სადაც ქვეყნის დედაქალაქის თავგადასავალი მხატვრულ კინემატოგრაფში უნდა განხორციელებულიყო. ჩვენი პარლამენტარიზმის ისტორიაში ეს იყო პირველი შემთხვევა, როდესაც კინემატოგრაფისტმა დეპუტატმა, თავის წინასაარჩევნო პროგრამაში შეიტანა პროექტი მხატვრული ფილმის გადაღებისა და ამომრჩეველმა (84 საარჩევნო ოლქი, 1990 წ.) მას მხარი დაუჭირა. სახელმწიფო დაკვეთით დაწყებული ფილმის წარმოება კ/ს „სამშობლოში“ პუტჩის დროს შეაჩერეს 1992 წლის 13 იანვარს, თანხები და ჰონორარი სხვა ფილმებზე გადააფორმეს.
   ალექსანდრე ჟღენტის ძალისხმევით (იგი საპარლამენტო კინოკომისიის თავმჯდომარე იყო), ჩამოყალიბდა ეროვნული სახელმწიფო კინოკორპორაცია, რომელიც პუტჩის შემდეგ გააუქმეს. ეს იყო საქართველოში პირველი არაკომუნისტური კინოსტრუქტურა. ალექსანდრე ჟღენტმა საქართველოში პირველმა ჩამოაყალიბა სპეციალიზებული სტუდია „ სამშობლო“, რომლის პროფილი იყო ისტორიული ფილმების წარმოება (1991 წ.). პუტჩის შემდეგ სტუდია გაუქმდა, რეჟისორის ინიციატივით იურიდიულად გაფორმდა სპორტული ფილმების სპეციალიზებული სტუდიის შექმნა „მემატიანეში“ 2009 წელს. ასეთი სტუდიის ჩამოყალიბება პირველი შემთხვევაა ჩვენთან.
   ალექსანდრე ჟღენტმა პირველმა საბჭოთა კავშირიდან მიიღო პალერმოს საერთაშორისო სპორტული ფილმების ფესტივალის „გრან-პრი“ „პალადინო დი ორო“(ოქროს პალადინი), ფილმისთვის „გაუმარჯოს ქართულ ფეხბურთს“ (1988 წ.). ფილმი შეტანილია უგო კაზირაგისა და კლაუდიო ბერტიერის მსოფლიო კინოენციკლოპედიაში. 1988 წ. საქართველოდან პირველმა მოიპოვა სპორტული ფილმების მსოფლიოში უმთავრესი მილანის საერთაშორისო ფესტივალის პრიზი „ებერჰარდი“, ფილმისთვის „სტადიონი“ (1980 წ.) - ყველა ნომინაციაში საუკეთესო ფილმისთვის. გადაღებიდან 23 წლის შემდეგ, მისი ინიციატივით სსრკ-ს დაშლამდე 2 წლით ადრე, ჩატარდა ქვეყნის ეროვნული საფეხბურთო ჩემპიონატი, რის საფუძველზე მიგვიღეს ფიფაში დამოუკიდებლობის აღდგენის შემდეგ. ეროვნული ფეხბურთის ფედერაციის დამფუძნებელ ყრილობაზე ალექსანდრე ჟღენტს მიანიჭეს მანდატი N1. ახლად ჩამოყალიბებული საქართველოს ფეხბურთის ფედერაციაში, იგი აირჩიეს საექსპერტო კომიტეტის პირველ თავმჯდომარედ. იგი იყო დამოუკიდებელი საქართველოს სპორტული კინოსა და ტელევიზიის ფედერაციის პირველი პრეზიდენტი (2002-2008 წწ.). მისი ინიციატივით სპორტული კინოსა და ტელევიზიის ფედერაციამ მიიღო გადაწყვეტილება პირველად აღენიშნა სპორტული კინოსა და ტელევიზიის საერთაშორისო დღე (2002 წ.).
   2006 წელს ალექსანდრე ჟღენტის ძალისხმევით ტვ „პირველ სტერეოზე“ საქართველოში პირველად შეიქმნა გადაცემა ”სპორტილუზიონი”, რომელიც რამდენიმე გადაცემის შემდეგ მაყურებელთა რეიტინგის უმაღლესი საფეხური დაიკავა. 11 გადაცემის შემდეგ ”სპორტილუზიონი” შეწყდა.
   საქართველოს პირველი ეროვნული საფეხბურთო ჩემპიონატის პირველი მატჩი სოხუმში ალექსანდე ჟღენტმა გახსნა 1990 წლის 12 აპრილს, III ტურის მატჩში ერთმანეთს ხვდებოდნენ „ცხუმი“ (სოხუმი) და „სამგურალი“ (წყალტუბო).
   ალექსანდრე ჟღენტმა გადაიღო პირველი ფილმი პრეზიდენტ ზვიად გამსახურდიას შესახებ (1991 წ.) „გაუმარჯოს პრეზიდენტს!“
2013-10-27 - nutsa

2. ალიკო, ფეისბუკზე მაინც ვერ გნახე. გილოცავ დიდ ჯილდოს.
2011-11-08 - Merabi






.

Copyright © 2007 Georgian National Filmography. All Rights Reserved.